![](https://setur.cdn.fo/savn/3817/npp-projekt1.jpg?width=624&height=350&rmode=crop&s=3Z-R7yowG17Dvi4Fp_4GsV1__cc)
Alstóran týdning, at Føroyar eru við
Nú Northern Periphery Programme fer inn í annað stuðulsjáttanarumfar, er umráðandi, at Føroyar og føroyskir granskarar eru við til at lofta hesum nýggja møguleika.
Heitini NPP og NPA eru ikki serliga kend millum manna, men tey fevna um eina stuðulsskrá hjá ES, ið er nevnd Northern Periphery Programme, ið fíggjar fleiri føroyskar verkætlanir.
Orsøkin til, at tað hevur týdning fyri Føroyar at vera við í einari slíkari avtalu, eru fleiri. Fyri tað fyrsta so er talan um ein fíggjarligan fyrimun fyri Føroyar. Hetta tí at Føroyar, fyri at gjalda eina upphædd á 900.000,- , fáa atgongd til ein grunn hjá ES, við umleið 50 milliónum í.
Onnur orsøkin er, at Føroyar fáa atgongd til evropeisk netverk innan gransking og íverksetan, og harvið atgongd til spennandi og mennandi verkætlanir fyri føroyska samfelagið, ið bera ítøkilig og praktisk úrslit við sær.
Føroyar hava verið við í tiltakinum NPP 2007 – 2013. Nú verður sett á annað skeið, ið eitur NPA 2014 – 2020.
Samanlagt hava Føroyar luttikið í 10 verkætlanum í fyrra tíðarskeiði. Talan er um verkætlanir fyri út í móti 9 mill. kr.
Nú verður heitið á verkætlanini broytt til NPA, tí ynski er um at seta størri fokus á arktiska økið sum eitt komandi vakstrarøki. Føroyar eru partur av hesum øki, saman við Íslandi og Grønlandi, og tí hevur tað alstóran týdning fyri okkum, at vit eru við frá byrjan. Orsakað av m.a. veðurlagsbroytingum liggja stórar avbjóðingar fyri framman, men samstundis gevur hetta Føroyum nýggjar og spennandi møguleikar.
Øll kunnu luttaka í NPP/NPA verkætlanum, men tað krevur eitt ávíst fíggjarligt fótafesti og eina umsiting, ið megnar at átaka sær tað sum krevst av pappírsarbeiði. ES verkætlanir kunnu tí vera ein avbjóðing fyri smáar stovnar og feløg, men tó ikki ógjørligt, um rætt verður atborið.
Sum lítið samfelag í Norðuratlantshavi, eiga vit at síggja møguleikarnar í hesum, og lofta gagnligum verkætlanum, ella sjálvi leggja upp til verkætlanir, ið gagna okkum. Tess fleiri tess betur. Men fyri at hetta skal lata seg gera, er umráðandi at Setrið og aðrir stovnar síggja møguleikarnar og stuðla undir at farið verður undir slíkar verkætlanir.
Tær flestu NPP verkætlaninar, ið hava verið í Føroyum, hava verið tongdar at stovnum sum Granskingardeplinum fyri Samfelagsmenning, Havstovuni, Heilsu- og almannaverkinum, Kommunufelagnum o.l.
Dømir um verkætlanir eru:
1. NOCRY – Northern Creative Youth
Verkætlanin skal stimbra kreativa íverksetan í útjaðaraøkjum.
Føroyskur luttakari: Samvit/Uttanríkisráðið
Játtan: EUR: 45.951
2. Economusées Northern Europe
Menna livandi søvn eftir kanadiskari fyrimynd. Í Føroyum er Mikkjalssmiðja á Trøllanesi bygd.
Føroyskir luttakarar: Granskingardepilin fyri Samfelagsmenning og Útoyggjafelagið
Játtan: EUR: 129.414
3. OLE II – Our Life as Elderly II
Verkætlanin er ætlað til millum annað at implementera Eden Alternative á røktarheimum.
Føroyskur luttakari: Nærverkið
Játtan: EUR: 183.971
4. RRR – Retail in Rural Regions
Bøta um møguleikarnar fyri at gerandisvørur og tænastur eisini vera veittar í útjaðaraøkjum.
Føroyskur luttakari: Granskingardepilin fyri Samfelagsmenning
Játtan: EUR: 85.229
5. WATER – Warning of Algal Toxin Events
Skal menna skjótar hættir at staðfesta um skeljadýr eru eitrað og tí ikki kunnu seljast. Sum nú er tekur hetta upp til 2 vikur. Við nýggja háttinum kann tað taka minni enn 24 tímar.
Føroyskur luttakari: Havstovan
Játtan: EUR: 172.272
6. Thing
Menna gomlu tingstaðirnar í Norðurhøvum sum ferðavinnumál. Í Føroyum er tað serliga Tinganes.
Føroyskur luttakari: Kunningarsstovan í Tórshavn
Játtan: EUR: 63.200
7. Smallest
Menna møguleikan so at lítil oyggjasamfeløg kunnu brúka varandi orkumøguleikar.
Føroyskir luttakarar: Fuglafjarðar Kommuna og Orkudepilin á Kambsdali
Játtan: EUR: 131.130
8. RYE3 – Rural Youth Entrepreneurship
Við støði í norðurírsku skipanini Young Entrepreneurs Programme (YEP) skulu íverksetaramøguleikar hjá ungum í útjaðaraøkjum mennast.
Føroyskur luttakari: Granskingardepilin fyri Samfelagsmenning
Játtan: EUR: 61.375
9. Craft International
Við støði í Economuseumsverkætlanini er ætlanin at stimbra søvnini enn meiri og geva teimum møguleikan at selja á altjóða marknaðinum eftir sama leisti, sum kanadisku søvnini gera.
Føroyskur luttakari: Granskingardepilin fyri Samfelagsmenning og Útoyggjafelagið
Játtan: EUR: 104.627
10. RemoDem – Support of people with dementia in remota areas
Við hjálp av framkomnari samskiftistøkni og aðrari tøkni, sonevndari vælferðartøkni, skulu møguleikarnir hjá dementum at vera búgvandi í egnum heimi betrast.
Føroyskur lutakari: Nærverkið
Játtan: EUR: 119.389
Tilsamans er játtað til 10 verkætlanir. EUR: 1.100.224 sum svarar til DKK 8.713.142.30.
Umframt tað eru 6.666 evrur játtaðar til fyrireiking av trimum verkætlanum og 60.751 evrur til Regional Contact Point funktiónina í Føroyum, sum NORA umsitur eftir áheitan frá landsstýrinum.
Tað vil siga, at Føroyar hava fingið játtað tilsamans 1.167.561 evrur. Føroyska gjaldið til NPP er í tíðarskeiðinum 2007-2013 tilsamans 889.848 evrur. T.v.s. eitt yvirskot uppá góðar 2 milliónir krónur.
Kelda: Norrønt Atlantssamstarv, RCP fyri Føroyar í Northern Periphery Programme
- 16.08.2024 FróðskapurSeinastu tvær greinarnar frá Eivindi Weyhe sálaTvær stuttar greinar um staðarnøvn eftir Eivind Weyhe sál...
- 24.07.2024 Setrið Deildin fyri Heilsu- og SjúkrarøktarvísindiDiabetes2: Evstamark at melda til kanningina er 31. juliFróðskaparsetur Føroya og Steno Miðstøðin í Sjúkrahúsverk...
- 23.07.2024 Setrið FøroyamálsdeildinMinningarorð um Eivind WeyheViðhvørt virkar tað sum um, at ringitónin á telefonini lj...