![](https://setur.cdn.fo/savn/3732/sveisisk_vitjan1.jpg?width=624&height=350&rmode=crop&s=kqukYtIQW4xArll0BlprTKw7yOo)
Fremmandar vitjanir
Hetta er árstíðin, tá ið nógvar útlendskar vitjanir eru. Á Føroyamálsdeildini merkja vit eisini tann stóra áhugan, sum er fyri føroyskum máli, bókmentum og føroyskum viðurskiftum sum heild uttanlands.
Í mai var ein hópur við 26 lesandi frá universitetinum í Zürich í Sveis á vikulangari ferð í Føroyum. Tey vitjaðu m.a. á Føroyamálsdeildini, har ið tey í ymsum stuttum fyrilestrum fingu innlit í virksemi og gransking á deildini. Á ferðini vóru tey annars víða um og fingu á tann hátt eina breiða og fjøltáttaða mynd av lívi, virki og náttúru í landinum, sum longu í síni staðseting mitt úti í víðum havi víkur so nógv frá teirra egna mitt ímillum onnur lond á meginlandinum í Evropa. Um miðjan juni koma 17 onnur lesandi úr Basel í Sveis saman við tveimum lærarum. Tey ætla eisini at vitja á Føroyamálsdeildini. Øll hesi lesandi hava á skeiði frammanundan fyrireikað seg til ferðina við at lesa um mál, bókmentir, mentan, søgu og samfelagsviðurskifti í Føroyum og hava haraftrat havt stutt innleiðsluskeið í føroyskum máli við lærara av Føroyamálsdeildini.
Seinni í summar – frá 21. juli til 2. august – vitja um leið 20 limir í Týskum-føroyskum vinafelag. Felagið hátíðarheldur í ár 25 ára stovningarár sítt og skipar í hesum sambandi fyri ferðini til Føroya. Á skránni eru útferðir, gongutúrar og vitjanir á søvnum og stovnum, m.a. á Fróðskaparsetrinum. 25. juli hevur felagið aðalfund og hátíðarheldur aftaná 25 ára dagin við móttøku í Norðurlandahúsinum.
Og mitt í øllum hesum skipar Føroyamálsdeildin fyri norðurlendskum summarskeiði í føroyskum fyri universitetslesandi úr øllum Norðurlondum. Tað skeiðið byrjar 10. juni og varir til 30. juni.
- 16.08.2024 FróðskapurSeinastu tvær greinarnar frá Eivindi Weyhe sálaTvær stuttar greinar um staðarnøvn eftir Eivind Weyhe sál...
- 24.07.2024 Setrið Deildin fyri Heilsu- og SjúkrarøktarvísindiDiabetes2: Evstamark at melda til kanningina er 31. juliFróðskaparsetur Føroya og Steno Miðstøðin í Sjúkrahúsverk...
- 23.07.2024 Setrið FøroyamálsdeildinMinningarorð um Eivind WeyheViðhvørt virkar tað sum um, at ringitónin á telefonini lj...