Heini luttekur á ST-fundi í Saudi Arabia
Talufrælsi, átrúnaður og altjóða lóg eru á skránni, tá heimsins lond hittast í havnabýnum Jeddah í Saudi Arabia mikudagin og hósdagin í hesi vikuni.
Eftir yvirgangsálopini í París og Keypmannahavn í januar og februar er fundurin aktuellur og fer m.a. at snúgva seg um, hvørt ásetingarnar um talufrælsi í altjóða lóg skulu orðast av nýggjum, hvussu rættindi hjá minnilutum verða vard og hvussu ekstremisma skal basast. Fleiri av teimum stóru limalondunum í ST hava í mong ár ynskt greiðari og strangari ásetingar, m.a. Russland og tey stóru muslimsku londini sum Saudi Arabia, Pakistan og Egyptaland. Hinumegin hava USA og ES-londini tvíhildið um, at talufrælsið ikki skal skerjast í altjóða lóg.
Fundurin er tann fimti í sonevndu Istanbul-prosessini – ein diplomatiskur dystur sum byrjaði í Istanbul í Turkalandi í 2011. Fyrr hava slíkir fundir verið fyri afturlatnum hurðum, men hesaferð hevur felagsskapurin hjá teimum muslimsku londunum, OIC, boðið fleiri mannarættindafelagsskapum og granskarum við. Sum liður í ph.d.-gransking um religión og altjóða talufrælsi luttekur Heini í Skorini umvegis Dansk Institut for Menneskerettigheder, sum eisini hevur annað umboð í Jeddah. Verkætlanin er fíggjað av Granskingarráðnum og Fróðskaparsetri Føroya, og Heini er innskrivaður á King’s College London. Umframt stjórnarumboð frá USA, Evropa og muslimska heiminum luttaka eisini felagsskapir sum Human Rights Watch, Amnesty International og serfrøðingar úr vesturheiminum og muslimska heiminum.
- 16.08.2024 FróðskapurSeinastu tvær greinarnar frá Eivindi Weyhe sálaTvær stuttar greinar um staðarnøvn eftir Eivind Weyhe sál...
- 24.07.2024 Setrið Deildin fyri Heilsu- og SjúkrarøktarvísindiDiabetes2: Evstamark at melda til kanningina er 31. juliFróðskaparsetur Føroya og Steno Miðstøðin í Sjúkrahúsverk...
- 23.07.2024 Setrið FøroyamálsdeildinMinningarorð um Eivind WeyheViðhvørt virkar tað sum um, at ringitónin á telefonini lj...