Johan Í.S. Hansen settur sum fyrisitingarstjóri á Setrinum

Stýrið fyri Fróðskaparsetur Føroya hevur gjørt av at seta Johan Í.S. Hansen í starv sum nýggjan fyrisitingarstjóra.

Johan er 51 ár og útbúgvin Cand.merc.-dat. innan vinnubúskap og kunningartøkni frá Copenhagen Business School og hevur síðan 1995 arbeitt innan leiðslu, KT og gransking í Danmark, Írlandi, USA og Stórabretlandi.

Johan hevur fyrr arbeitt fyri fyritøkurnar Microsoft, Berlitz og RealNetworks umframt at hava luttikið í KT-granskingararbeiði við Copenhagen Business School og University of Washington.

Johan arbeiddi fyri amerikansku fyritøkuna RealNetworks í 15 ár; fyrstu sjey árini á høvuðsskrivstovuni í Seattle og síðan átta ár í London, har hann var stjóri við marknaðarábyrgd fyri Evropa, Miðeystur, Afrika og Suðuramerika.

Hann fæst í løtuni við KT- og leiðsluráðgeving í London og tekur við starvinum sum fyrisitingarstjóri í august.