![](https://setur.cdn.fo/savn/3071/nk_1.jpg?width=624&height=350&rmode=crop&s=f-J_YzM6NPZJ1K83c6We-1kQS30)
Nordkursfundur í Føroyum
18.-19. september 2009 er Nordkursfundur í Føroyum. Hetta er tann árligi fundurin hjá teimum, sum skipa fyri summarskeiðunum í Norðurlondum. Norðurlond skiftast um at vera vertir, og í ár verður hann hildin í Føroyum.
Summarskeiðini verða fíggjað við pengum frá Norðurlendska ráðharraráðnum umvegis Nordplus, sum er ein mál- og mentanarskrá, ið skal styrkja málfatanina í Norðurlondum og økja áhugan fyri málum og mentanum í Norðurlondum.
Vit hava gjørt eina skipan, har Føroyar og Grønland skiftast um at hava skeið. Skipanin er soleiðis, at skeið er í Føroyum tvey fylgjandi ár, og tað triðja árið er skeið í grønlendskum í Grønlandi, og síðan hava vit aftur tvey fylgjandi ár o.s.fr.
Innihaldið í teimum føroysku skeiðunum, sum vara millum 3-4 vikur, er føroyskt mál, bókmentir og mentan. Tað er Føroyamálsdeildin, ið skipar fyri skeiðnum. Luttakararnir eru fólk, ið lesa norðurlendsk mál og bókmentir og almenn málvísindi í Norðurlondum. Summir av hesum studentunum eru ikki-norðbúgvar, sum lesa á norðurlendskum universitetum.
Endamálið við skeiðnum er at geva teimum lesandi kunnleika um føroyskt mál og føroyskar bókmentir og á tann hátt gera tey før fyri at seta føroyskt mál og bókmentirnar inn í ein størri norðurlendskan samanhang.
Stundentarnir verða býttir í tveir flokkar eftir fortreytum. Tað er bæði ein fyrimunur fyri studentarnar og fyri læraran, tí flokkarnir verða til tað smáir, samstundis sum støðið millum studentarnar verða javnari.
Umframt tímar í føroyskum máli og bókmentum, sum er miðleingjan á skeiðnum, eru fyrilestrar um t.d. kvæði og dans, politiska søgu, tónleik, miðlar, myndlist, barnabókmentir og bókmentaliga postkolonialismu o.m.a.
Slík norðurlendsk summarskeið hava verið nú í nógv ár, og nógvir eru teir studentarnir, sum gjøgnum árini hava verið á hesum skeiðum, og hjá summum teirra vakti skeiðið ein so stóran áhuga fyri føroyskum, at tey seinni í lívinum komu aftur og fóru at granska í føroyskum.
Eina ferð um árið hittast skeiðfyriskipararnir at tosa um viðurskiftini kring summarskeiðini. Fundurin verður hildin á Fróðskaparsetrinum. Fríggjadagin seinnapartin verður ein túrur gjørdur út á Reyn. Fríggjakvøldið er býráðið vertur fyri einum døgurða í móttøkuhúsunum í Tróndargøtu. Leygardagin er ætlanin at fara ein túr við sluppini Norðlýsinum, um veðrið er til vildar. Luttakararnir fara av stað aftur sunnudagin.
![](/fileadmin/user_upload/news/nk_2.jpg)
![](/fileadmin/user_upload/news/nk_3.jpg)
![](/fileadmin/user_upload/news/nk_4.jpg)
- 16.08.2024 FróðskapurSeinastu tvær greinarnar frá Eivindi Weyhe sálaTvær stuttar greinar um staðarnøvn eftir Eivind Weyhe sál...
- 24.07.2024 Setrið Deildin fyri Heilsu- og SjúkrarøktarvísindiDiabetes2: Evstamark at melda til kanningina er 31. juliFróðskaparsetur Føroya og Steno Miðstøðin í Sjúkrahúsverk...
- 23.07.2024 Setrið FøroyamálsdeildinMinningarorð um Eivind WeyheViðhvørt virkar tað sum um, at ringitónin á telefonini lj...