![](https://setur.cdn.fo/savn/7439/dhg.png?width=624&height=350&rmode=crop&bgcolor=fff&format=jpg&s=PQz7TieHLy9VpUTlUcMXmp46-yU)
Nýtt búmerki og nýggj gransking
Í dag er Depilin fyri heilsu- og almannagransking vertur fyri stórum tiltaki í Kongshøll við stúgvandi fullari skrá av feskari gransking og nýggjum búmerki, sum Edward Fuglø hevur sniðgivið
Kongshøll á Vestaru bryggju er nú seinnapartin karmur um eina sanna vísindaolympiadu, har ikki færri enn 35 granskarar hava stuttar framløgur um sína gransking.
Vertur er Depilin fyri heilsu- og almannagransking, sum er samstarv millum fremstu granskingarstovnarnar í Føroyum.
Tað var í 2014, at Fróðskaparsetrið, Landssjúkrahúsið og Deildin fyri arbeiðs- og almannaheilsu fóru undir formligt samstarv við tí endamáli at seta ferð á menning av heilsuvísindaligari gransking og útbúgving í Føroyum. Sjúkrakassagrunnurin veitti samstarvinum sjey milliónir krónur, og so varð Depilin fyri heilsu- og almannagransking stovnaður. Nøkur ár seinni, í 2019, kom Ílegusavnið eisini upp í samstarvið.
Depilin er staðsettur bygnaðarliga á Fróðskaparsetrinum, og hvør stovnur í samstarvinum hevur eitt umboð í stýrinum: Jan Rasmussen frá Landssjúkrahúsinum, Pál Weihe frá Deildini fyri arbeiðs- og almannaheilsu, Magni Mohr frá Setrinum og Guðrið Andorsdóttur frá Ílegusavninum. Maria Skaalum Petersen er depilsleiðari.
Gongd á heilsugranskingini
Verulig ferð er komin á heilsugransking í Føroyum.
Fjølbroytnið á granskingarhættum og -evnum er fleirfaldað, og tað sæst eisini á rúgvismiklu skránni fyri framløgudagin í dag.
Somuleiðis eru føroyskir heilsugranskarar í størri mun enn áður høvuðsgranskarar á teimum verkætlanum, sum verða framdar.
Seinastu árini eru 80-100 vísindaligar greinar komnar út árliga í altjóða tíðarrit frá teimum stovnunum, sum mynda Depilin fyri heilsu- og almannagransking.
Sum tað fyrsta á framløgudegnum í Kongshøll í dag avdúkaði Maria Skaalum Petersen nýggja búmerkið hjá Deplinum, sum Edward Fuglø hevur sniðgivið. Tað sæst ovast í hesi greinini.
Lesið meira um Depilin og virksemið hjá honum her.
- 12.07.2024 Setrið Søgu- og samfelagsdeildinTekna teg til gott stakskeið í lóg og leiðsluSøk um pláss á spennandi masterskeiði í Lóg og Leiðslu áð...
- 12.07.2024 Setrið Søgu- og samfelagsdeildinKom á stakskeið í búskaparstýring fyri leiðararSøk um pláss á spennandi masterskeiði í búskaparstýring f...
- 12.07.2024 SetriðNýggi bygningurin hjá Setrinum verður nú projekteraðurLandsverk hevur skrivað undir ráðgevarasáttmála við Henni...