![](https://setur.cdn.fo/savn/4459/aliringar.jpg?width=624&height=350&rmode=crop&s=fU9li3bh6gpIUIzxQQozQWu8SIc)
Ph.d.-ritgerð um rákið í og kring aliringar á sjónum
Heini Winthereig Rasmussen hevur ment myndlar, ið eru hent amboð til at gera metingar av sjógóðskuni í eini alistøð og hvussu møgulig smitta verður flutt millum ringarnar.
Fríggjadagin 2. desember fer Heini Winthereig Rasmussen, cand.polyt., at verja ph.d.-ritgerðina “Flow Through and Around a Group of Fish Farming Cages”. Í verkætlanini eru nágreiniligar mátingar gjørdar av, hvussu rákið broytist, meðan tað ferðast ígjøgnum útgerðina á aliøkinum á Gulanum. Síðani er roynt at endurskapa rákið við simuleringum við nýmentum teldumyndlum. Samanberingar eru eisini gjørdar við áður gjørdar mátingar í royndarbrunnum.
Hetta arbeiðið er millum fyrstu royndir yvirhøvur at fremja slíkar simuleringar fyri eitt alibrúk í fullari vinnuligari stødd. Slíkir teldumyndlar eru hent amboð til at gera metingar av sjógóðskuni í einum alianleggi og hvussu møgulig smitta verður flutt millum ringarnar.
Samanberingarnar vísa, at rákið broytist munandi meira í veruleikanum enn teldusimuleringar fyri ringar við ongum fiski í, geva ábendigar um. Víst verður á, at orsøkir til hetta kann verða gróður á nótunum og at nótin broytir skap orsakað av rákinum, umframt at laksurin kann hava stóran ávirkan á rákbroytingina. Niðurstøðan er tí, at leggjast má upp fyri hesum fyribrigdum fyri neyvt kunna greiða frá ráki og rákbroytingum í sambandi við teldusimuleringar.
Heini Winthereig Rasmussen, ið starvast hjá P/F Fiskaaling, hevur verið innskrivaður sum ph.d.-lesandi á Fróðskaparsetri Føroya. Verkætlanin er fíggjað av Granskingarráði Føroya og P/F Fiskaaling. Vegleiðarar hava verið Knud Simonsen, granskingarleiðari hjá Fiskaaling, Øystein Patursson, granskari á Fiskaaling, og Pascal Klebert, granskari á SINTEF.
Í próvnevndini eru Bárður Niclasen, adjunktur á Fróðskaparsetri Føroya, Odd Magnus Faltinsen, professari á Norges Tekniske og Naturvitenskapelige Unversitet (NTNU) , og David Fredriksson, professari á US Naval Academy, New Hampshire, USA.
Ritgerðin er til skjals alment á Landsbókasavninum. Verjan verður 2. desember kl. 13 stundisliga í høllini á Vinnuháskúlanum.
- 16.08.2024 FróðskapurSeinastu tvær greinarnar frá Eivindi Weyhe sálaTvær stuttar greinar um staðarnøvn eftir Eivind Weyhe sál...
- 24.07.2024 Setrið Deildin fyri Heilsu- og SjúkrarøktarvísindiDiabetes2: Evstamark at melda til kanningina er 31. juliFróðskaparsetur Føroya og Steno Miðstøðin í Sjúkrahúsverk...
- 23.07.2024 Setrið FøroyamálsdeildinMinningarorð um Eivind WeyheViðhvørt virkar tað sum um, at ringitónin á telefonini lj...