Ráðstevnuritið Frændafundur 7 útkomið
Nýggj bók við fjúrtan greinum um føroysk og íslendsk evnir, sum byggja á fyrilestrar á Frændafundi í Reykjavík 21. - 22. august 2010.
Mál - Søga og samfelag - Sniolvs kvæði - Mentan - Trypsin úr føroyskum og íslendskum toski
Út er komin bók við fjúrtan greinum, sum byggja á fyrilestrar á føroysk-íslendskari ráðstevnu í Reykjavík 21.-22. august 2010
Bókin er, eins og navnið sigur, tann sjeynda í hesari røðini. Greinarnar eru sum vant er á Frændafundi, um føroysk og íslendsk evnir.
Fýra greinar um málfrøði
Hjalmar P. Petersen skrivar um føroyskt mál á málamótinum við danskt. Þórhallur Eyþórsson skrivar um, hvussu føllini eru varðveitt í tolsøgn í ávikavist íslendskum og føroyskum. Jóhannes Gísli Jónsson og Kristín Þóra Pétursdóttir skriva um hvørjumfalsávirki við lýsingarorðum í íslendskum og føroyskum. Bjarki M. Karlsson o.o. greiða frá einari forkanning av ljóðkervisligum broytileika í føroyskum.
Sjey greinar um søgu- og samfelagsfrøði
Annfinnur í Skála skrivar um Føroyar og Ragnheiður Kristjánsdóttir um Ísland í seinna heimsbardaga. Ólöf Garðarsdóttir skrivar um, hvønn lut føroyingar og aðrir tilflytarar áttu í vøkstrinum og menningini á Seyðisfirði um aldamótið 1900. Hans Andrias Sølvará skrivar um gudfrøðistreymar og trúarrørslur í Føroyum og Íslandi. Høgni Djurhuus skrivar um tíðindaflutning og vantandi tíðindaflutning millum londini. Beinta og Jákupsstovu og Auður Styrkársdóttir bera saman støðuna hjá kvinnum í politikki í Føroyum og Íslandi, og Jens Pauli Nolsøe greiðir frá handilsviðurskiftunum millum Føroyar og Ísland, serliga í nýggjari tíð.
Sniolvs kvæði – Mentan – Trypsin í toski
Yelena Sesselja Helgadóttir ber saman Sniolvs kvæði, ta íslendsku fornaldarsøguna Ásmundar søgu kappabana og ta forntýsku Hildibrands kviðu (Hildebrandslied). Guðmundur B. Kristmundsson lýsir samskifti Føroya og Íslands í mentamálum. Bjarki Stefánsson, Guðrún Birna Jakobsdóttir og Ágústa Guðmundsdóttir bera saman trypsin úr føroyskum og íslendskum toski.
Ritstjórar eru Magnús Snædal og Turið Sigurðardóttir.
Útgevari: Hugvísindastofnun, Reykjavík. Umboð í Føroyum: Fróðskapur.
- 16.08.2024 FróðskapurSeinastu tvær greinarnar frá Eivindi Weyhe sálaTvær stuttar greinar um staðarnøvn eftir Eivind Weyhe sál...
- 24.07.2024 Setrið Deildin fyri Heilsu- og SjúkrarøktarvísindiDiabetes2: Evstamark at melda til kanningina er 31. juliFróðskaparsetur Føroya og Steno Miðstøðin í Sjúkrahúsverk...
- 23.07.2024 Setrið FøroyamálsdeildinMinningarorð um Eivind WeyheViðhvørt virkar tað sum um, at ringitónin á telefonini lj...