![](https://setur.cdn.fo/savn/3881/tota-arnadottir-meistarafyrilestur004-skorin.jpg?width=624&height=350&rmode=crop&s=aK1Y8C_y8N2vDEaQlbYBvaMXdHE)
Tóta Árnadóttir hildið meistarafyrilestur
Fyrilesturin hevði heitið "Fuglamotiv í føroyskum kvæðum - formur, innihald og granskingarsjónarhorn".
Hósdagin 06. februar helt Tóta Árnadóttir sín meistarafyrilestur. Meistarafyrilesturin er síðsti partur av MA-útbúgvingini, og verður hildin eftir at MA-ritgerðin er próvdømd og góðkend. Studenturin fær eina viku at fyrireika sín fyrilestur, sum tekur støði í ritgerðarevninum.
Evnið í MA-ritgerðini var “fuglurin sum mynd í eldri føroyskum kvæðum” og er ein kanning av motivinum “fuglur og kvinna”, sum tað kemur fyri í ymsum sniðum í føroyskum kvæðauppskriftum, samanborið við skyldar europeiskar heimildir.
Í innganginum tekur Tóta støði í vísuni ”Flúgvandi biðil” (CCF 127) og spyr, hvussu hon kann tulkast. Evnið í ritgerðini verður síðan nærri avmarkað til motivini veingjaðir menn, hamskiftir biðlar og fuglar sum boðberar millum kvinnu og umheim. Spurdómurin er at kanna, hvussu hesi motivini koma fyri í nøkrum valdum kvæðum. Tóta setir sær harumframt fyri at hyggja eftir, hvønn sýmbolskan týdning fuglarnir hava í eldri bókmentum og munnligum skaldskapi gjøgnum tíðina og í ymsum høpi og út frá hesum finna eitt støði at tulka fuglamotivini í teimum føroysku dømunum á.
Evnið, ið Tóta fekk til meistarafyrilesturin, var “Fuglamotiv í føroyskum kvæðum – formur, innihald og granskingarsjónarhorn”. Hon helt ein áhugaverdan fyrilestur, har hon stutt segði frá fuglum sum lýrisk motiv og fuglum í allegori, men legði størri dent á fuglar sum episk motiv. Støði var tikið í tveimum høvuðsmotivum. Fuglur sum boðberi og menn á flogi. Sum boðberi kann fuglur bæði tæna kvinnum og monnum og senda boð frá einum til annan. Menn á flogi kunnu koma til sjóndar sum maður í fuglahami, sum flýgur og maður á fuglabaki ella í fuglaklóm.
Ein áhugaverdur og undirhaldandi fyrilestur.
Tótu verður ynskt hjartaliga til lukku við MA-heitinum.
Næstu fyrilestrar eru 21. februar og 27. februar. Tá skulu ávikavist Katrin Reinert og Hanna Absalonsen halda meistarafyrilestur.
![](/fileadmin/user_upload/news/fuglar.jpg)
![](/fileadmin/user_upload/news/odin.jpg)
- 16.08.2024 FróðskapurSeinastu tvær greinarnar frá Eivindi Weyhe sálaTvær stuttar greinar um staðarnøvn eftir Eivind Weyhe sál...
- 24.07.2024 Setrið Deildin fyri Heilsu- og SjúkrarøktarvísindiDiabetes2: Evstamark at melda til kanningina er 31. juliFróðskaparsetur Føroya og Steno Miðstøðin í Sjúkrahúsverk...
- 23.07.2024 Setrið FøroyamálsdeildinMinningarorð um Eivind WeyheViðhvørt virkar tað sum um, at ringitónin á telefonini lj...