Um útbúgvingina

Læraraútbúgvingin snýr seg um at menna førleikar til at undirvísa, leiða og stuðla næmingum í teirra læring og trivnaði. Ein lærari er upptikin av, hvussu børn og ung læra, trívast og mennast – bæði fakliga og menniskjaliga.

Upptøkutreytir

Tey, ið fara undir læraralestur, skulu hava staðið bókligt miðnámsprógv (t.e. gymnasialt miðnám), og tey skulu hava havt føroyskt á A-stigi og støddfrøði á C-stigi.

Umsøkjarar, ið søkja eftir kvotu 2, skulu kunna skjalprógva, at teir hava útbúgvingar og/ella starvsroyndir, ið kunnu javnmetast við gymnasialt miðnámsprógv.

Søk umvegis Vangan

Søk her

Innihald

Grundskeiðini eru skipað í eina skeiðsrekkju, ið kallast Undirvísing og læring (stuttstavað U&L). Hesi skeið varpa ljós á lærarayrkið í síni heild og tær avbjóðingar, ið ein lærari skal loysa, líkamikið um hann undirvísir í grunddeild, miðdeild ella hádeild fólkaskúlans.

Linjugreinalesturin skal fyrireika tann lesandi at undirvísa í úrvaldum lærugreinum.  Lærugreinarnar, ið tann lesandi kann velja ímillum, kunnu skiftast sundur í:

Mállærugreinar

• Føroyskt
• Danskt
• Enskt
• Týskt

Hugvísindaligar og/ella samfelagsvísindaligar lærugreinar

• Søga og samtíð
• Samfelagsfak
• Kristni

Náttúruvísindaligar lærugreinar og støddfrøði

• Landalæra
• Lívfrøði
• Alis/evnafrøði
• N&T
• Støddfrøði

Skapandi lærugreinar

• Handarbeiði
• Smíð
• Myndlist
• Tónleik

Ítrótt og heilsa

• Ítrótt
• Heimkunnleiki

Í “Kunngerð um útbúgving av fólkaskúlalærarum” (2021) stendur, at dekanurin tekur avgerð um, hvørjar linjugreinar verða boðnar út hvørt lestrarár. Og tað stendur somuleiðis, at dekanurin hevur heimild at bjóða út aðrar linjugreinar, umframt linjugreinar, ið eru samansettar av fleiri lærugreinum fólkaskúlans.

Starvslæran er ein samfastur partur av læraraútbúgvingini. Lesandi kunnu fara í starvslæru í øllum fólkaskúlum og frískúlum í Føroyum. Og tey hava somuleiðis møguleika at taka starvslæruna í øðrum landi.

Læraraútbúgvingin er á BEd-stigi. Hetta merkir, at læraralesandi kunnu taka partar av læraralestrinum á lærdum háskúlum uttanlands. Skiftislesturin verður skipaður í tøttum samstarvið millum Námsvísindadeildina og læraraútbúgvingar aðrastaðnis.  

Skipan av útbúgvingini

Læraraútbúgvingin er sett saman av trimum høvuðspørtum. Hesir eru:

Grundlærugreinar

• Undirvísing og læring I - VI
• Føroyskt á grund (1. - 6. flokk)
• Støddfrøði á grund (1. -6. flokk)

Linjugreinalestur

• Lesandi velja sær tríggjar linjugreinar

Starvslæra 

• 3 vikur fyrsta lestrarár
• 5 vikur annað, triðja og fjórða lestrarár

Fyrsta lestrarár hava tey lesandi U&L I & II, ið taka støði í ávikavist námsfrøðiligari sálarfrøði og mál- og lesimenning. Harumframt hava tey eitt skeið, ið kallast “føroyskt á grund” og eitt skeið, ið kallast “støddfrøði á grund”. Hesi skeið skulu fyrireika tann lesandi at undirvísa í grunddeild og miðdeild fólkaskúlans í hesum báðum lærugreinum.

Annað lestrarár hava tey lesandi U&L III & IV, ið taka støði í ávikavist almennari námsfrøði og lívsáskoðan og siðalæru. Harumframt hava tey sína fyrstu linjulærugrein.

Triðja lestrarár hava tey lesandi U&L V & VI, ið taka støði í ávikavist í almennari didaktikk og sernámsfrøðligum avbjóðingum. Afturat hesum hava tey sína næstu linjulærugrein.

Fjórða lestrarár taka tey lesandi sína fjórðu linjulærugrein. Harumframt hava tey Vísindaástøði og háttaløg, áðrenn tey skriva og verja sína BEd. ritgerð.

Vallærugreinar

• Allar lærugreinar fólkaskúlans

Starvsmøguleikar

Tey, ið hava staðið læraraútbúgvingina, kunnu søkja starv

• í øllum fólkaskúlum í landinum
• í øllum forskúlum og frískúlum í landinum
• í fólkaskúlum og frískúlum í grannalondunum

Lestrarmøguleikar

BEd.-prógvið gevur atgongd til ymiskar master- og kandidatútbúgvingar á námsfrøðiliga økinum.

Lestrarlív

Tá tú byrjar at lesa á Fróðskaparsetri Føroya, verður tú partur av einum livandi og tætt knýttum lestrarumhvørvi mitt í hjartanum av Havnini. Her ert tú – saman við hinum lesandi – í miðdeplinum, bæði tá ið tað kemur til læring og sosialt lív.

Frá fyrsta degi verður tú væl móttikin til eina skipaða intro-viku og verður partur av einum lestrarbólki saman við øðrum nýggjum lesandi.

Gott lestrarumhvørvi

Á Setrinum verður nógv gjørt fyri at skapa eitt gott lestrarumhvørvi. Her eru lestrarhøli, køkar og lestrarstovur, har tú kanst arbeiða saman við øðrum, drekka ein kaffimunn og taka tær av løttum. 

Tú fært skjótt eina kenslu av, hvussu tað er at lesa á einum universiteti, og hvussu tað er at vera partur av einum spennandi og mennandi felagsskapi.

Felagsskapur og netverk

Tú kanst eisini luttaka í ymiskum felagsskapum og tiltøkum, sum verða skipað av og fyri lesandi. Her møtir tú fólki úr øðrum útbúgvingum og árgangum – eitt frálíkt høvi at knýta vinabond og skapa eitt sosialt netverk. Eisini hevur tú møguleika at luttaka í ráðum og nevndum, har tú kanst gera mun og fáa royndir, sum kunnu brúkast seinni í lívinum.

At lesa í Føroyum merkir eisini, at náttúran og mentanin eru altíð tætt við. Tað er stutt millum lestrarhøli og fjøll, hav og mentanarlív – og hetta ger Tórshavn til eitt serliga gott stað at vera lesandi.

Endamál

Endamálið við útbúgvingini er at útbúgva fólkaskúlalærarar, sum eru førir fyri at leggja til rættis, fremja og eftirmeta fjølbroyttar lærugongdir, so einstaki næmingurin kann mennast við støði í egnum fortreytum.

Próvtøkur

Øll skeið á læraraútbúgvingini enda við próvtøku. Í skeiðslýsingunum verður nágreinað

• hvør próvtøkuháttur verður nýttur
• um ein nýtir innanseturs ella uttanseturs próvdómara
• um lesandi skulu til próvtøku einsæris ella í bólki
• um lesandi fáa próvtal ella staðið/ikki staðið fyri avrikið

Bygnaður

Nærri kunning

Nærri kunning fæst við at venda tær til Irenu Tróndheim ella Paulinu Poulsen, sum báðar eru lestrarvegleiðarar á Námsvísindadeildini ella við at venda tær til Rúnu í Skála, útbúgvingarleiðara.