Um útbúgvingina

Útbúgvingin í námsfrøði snýr seg um uppaling, útbúgving, undirvísing og læring – og hvussu hesi fyribrigdi hava broytt seg í samfelagnum gjøgnum tíðina.

Upptøkutreytir

Treyt fyri upptøku er bókligt (t.e. gymnasialt) miðnámsskúlaprógv.

Verður søkt eftir kvotu 2, kunnu aðrar fortreytir við javnsettum kunnleikastøði góðtakast eftir nærri meting.

Søk umvegis Vangan

Søk her

Innihald

Á grundskeiðunum verður dentur lagdur á námsfrøðiligan, sálarfrøðiligan og didaktiskan førleika, sum saman við kunnleika um sosialisering, málmenning og kreativitet gevur tí lesandi eina grundleggjandi vitan um og fatan av eini vísindaástøðiligari tilgongd til námsfrøðiliga og sernámsfrøðiliga arbeiðið. Tey lesandi skulu læra at virka og samstarva um heildarmenning av menniskjanum.

Á triðja lestrarárinum verður farið í dýpdina í námsfrøðini og sernámsfrøðini, har lesandi tilogna sær eina servitan og førleikar til at skipa og fremja námsfrøðiligt virksemi á høgum stigi. Lesandi arbeiða eisini við at megna at taka støði í einstaka menniskjanum og bólkum.

Fjóða lestrarár verður dentur lagdur á ymiskar kreavtivar greinar, sum verða knýttar at dagstovna- og sernámsfrøðini. Síðani skulu lesandi í eina sjálvstøðuga einsæris starvslæru, og eftir hetta verður farið undir endaliga avrikið á útbúgvingini, sum er ein Bachelorverkætlan.

Partur av útbúgvingartíðini er skipað sum starvslæra á námsfrøðiligum stovnum.

Skipan av útbúgvingini

Tvey tey fyrstu støðisárini eru skipað sum grundskeið, sum geva teimum lesandi eina grundleggjandi vitan í námsfrøði, sernámsfrøði, sálarfrøði og sosiologi. Harumframt eru onnur viðkomandi skeið og starvslæra knýtt at ávikavist dagstovna-og sernámsfrøðiliga økinum.

Á triðja og fjórða lestrarári nemur tann lesandi sær á høgum fakligum stigi námsfrøðiliga, didaktiska og kreativa servitan, umframt førleika at skipa fyri námsfrøðiligum virksemi á dagstovna- og sernámsfrøðiliga økinum.

Partur av útbúgvingartíðini er skipað sum starvslæra á námsfrøðiligum stovnum.

Á triðja og fjórða lestrarárinum kann partur av lestrinum lesast uttanlands, og starvslæran á fjórða lestrarárinum kann eisini takast uttanlands.

Framtíðarmøguleikar

Nógvir fjølbroyttir starvsmøguleikar eru á námsfrøðiliga økinum, har nýggj vitan støðugt gevur nýggjar spennandi avbjóðingar. Sum námsfrøðingur kanst tú arbeiða í vøggustovu, barnagarði, frítíðarskúla, ungdómshúsi og á mongum økjum á serøkinum.

Framhaldandi útbúgving

B.Ed.-lesturin gevur atgongd til master- og kandidatútbúgvingar á námsfrøðiliga og didaktiska økinum.

Lestrarlív

Tá tú byrjar at lesa á Fróðskaparsetri Føroya, verður tú partur av einum livandi og tætt knýttum lestrarumhvørvi mitt í hjartanum av Havnini. Her ert tú – saman við hinum lesandi – í miðdeplinum, bæði tá ið tað kemur til læring og sosialt lív.

Frá fyrsta degi verður tú væl móttikin til eina skipaða intro-viku og verður partur av einum lestrarbólki saman við øðrum nýggjum lesandi.

Gott lestrarumhvørvi

Á Setrinum verður nógv gjørt fyri at skapa eitt gott lestrarumhvørvi. Her eru lestrarhøli, køkar og lestrarstovur, har tú kanst arbeiða saman við øðrum, drekka ein kaffimunn og taka tær av løttum. 

Tú fært skjótt eina kenslu av, hvussu tað er at lesa á einum universiteti, og hvussu tað er at vera partur av einum spennandi og mennandi felagsskapi.

Felagsskapur og netverk

Tú kanst eisini luttaka í ymiskum felagsskapum og tiltøkum, sum verða skipað av og fyri lesandi. Her møtir tú fólki úr øðrum útbúgvingum og árgangum – eitt frálíkt høvi at knýta vinabond og skapa eitt sosialt netverk. Eisini hevur tú møguleika at luttaka í ráðum og nevndum, har tú kanst gera mun og fáa royndir, sum kunnu brúkast seinni í lívinum.

At lesa í Føroyum merkir eisini, at náttúran og mentanin eru altíð tætt við. Tað er stutt millum lestrarhøli og fjøll, hav og mentanarlív – og hetta ger Tórshavn til eitt serliga gott stað at vera lesandi.

Endamál

Endamálið við útbúgvingini er at útbúgva námsfrøðingar, sum eru førir fyri at fyrireika, fremja, eftirmeta, menna og skjalprógva námsfrøðiligt og sernámsfrøðiligt arbeiði við børnum, ungum og vaksnum. Ein útbúgvin námsfrøðingur skal somuleiðis vera førur fyri at grunda yvir og meta um námsvísindaligar meginspurningar.

Bygnaður

Próvtøkur

Øll skeið enda við eftirmeting ella próvtøku. Í skeiðslýsingunum verður nærri ásett, um eftirmetingar og próvtøkur eru við innanhýsis ella við uttanhýsis próvdómara. Skilt verður millum, um avrikið verður mett sum staðið/ikki staðið, ella við próvtali eftir galdandi próvtalsstiga. Eftirmetingar og próvtøkur kunnu verða skipaðar sum einstaklingsavrik ella í bólki.

Nærri kunning

Nærri kunning fæst við at venda tær til Irenu Tróndheim ella Paulinu Poulsen, sum báðar eru lestrarvegleiðarar á Námsvísindadeildini  ella við at venda tær til Marius Joensen, útbúgvingarleiðara.