MSSc í samfelagsvísindum og stjórnmálafrøði
- Lestrartíð 2 ár
- Deild Søgu- og samfelagsdeildin (SSD)
- Tal á Lesandi Uml. 20
- ECTS 120
- Lestrargjald (Fulltíðarlestur) Ókeypis fyri borgarar í danska ríkinum o.ø. Norðurlondum
- Lestrargjald (Stakgreinir) 200 DKK/ECTS
Endamál
Hendan masterútbúgvingin gevur hollar førleikar at arbeiða við samfelagsligum og stjórnmálafrøðiligum uppgávum í tí privata, almenna og sjálvbodna geiranum. Við MSSc í samfelagsvísindum og stjórnmálafrøði fært tú eisini førleikar til víðari lestur á ph.d.-stigi.
Útbúgvingin mennir evnini hjá lesandi at arbeiða við samfelagsligum og stjórnmálafrøðiligum viðurskiftum og leggur dent á kritiska hugsan og sjálvstøðugt vísindaligt arbeiði. Útbúgvingin hevur eisini til endamáls at menna førleikar til at virka bæði í smátjóðum og oyggjasamfeløgum og í størri londum og altjóða samanhangum.
Bygnaður
Bygnaðurin á útbúgvingini sæst í myndini niðanfyri. Tó kunnu einstakar broytingar koma fyri, tá verandi skeið verða broytt, ella tá nýggj skeið verða ment. Men grundleggjandi leisturin er tó hin sami.
1. lestrarhálva | 2. lestrarhálva | 3. lestrarhálva | 4. lestrarhálva |
Vísindaástøði og háttalag á master 10 ECTS |
| 25 ECTS | |
Samfelagsvísindi og stjórnmálafrøði í smátjóðum og oyggjasamfeløgum 10 ECTS | 30 valfrí ECTS á Fróðskaparsetrinum og/ella útlendskum universiteti | Fyrireikandi skeið til masterritgerð 5 ECTS | Masterritgerð 30 ECTS |
10 ECTS |
Skipan av útbúgvingini
Útbúgvingin tekur tvey ár.
Í fyrstu lestrarhálvu verður dentur m.a. lagdur á vísindaástøði og háttaløg (10 ECTS). Onnur 10 ECTS snúgva seg um verkætlanararbeiði í bólki, og eitt triðja skeið snýr seg um at kanna samfelagsvísindaligar og stjórnmálafrøðiligar spurningar í ljósinum av smátjóðum og oyggjasamfeløgum.
Í aðru lestrarhálvu eru 30 valfrí ECTS, sum tann lesandi kann taka á Fróðskaparsetrinum ella á útlendskum universiteti. Í summum førum kann partur av hesum semestrinum ikki vera valfríur, men kravdur.
Í triðju lestrarhálvu fer tann lesandi í praksislæru. Hetta merkir, at avtalað verður gjørd millum tann lesandi, Fróðskaparsetrið og eitt føroyskt arbeiðspláss. Í hesum semestrinum arbeiðir tann lesandi við eini fakligari uppgávu, samstundis sum hann ella hon luttekur í seminarvirksemi á Setrinum. Harafturat er ein minni partur av lestrarhálvuni (5 ECTS) ein ástøðilig og metodisk fyrireiking til høvuðsritgerðina.
Í fjórðu lestrarhálvu skal sjálv masterritgerðin skrivast við vegleiðing.
Innihald
Útbúgvingin viðger samanspælið millum menniskju og samfelagsins sosialu og politisku strukturar og stovnar. Umframt hetta mennir útbúgvingin eisini førleikan at hugsa vísindaligt og tvørvísindaligt og arbeiða við ymiskum vísindaligum háttaløgum. Samstundis kunnu lesandi menna ein sjálvstøðugan fakligan profil, og við praksislæru á triðja semestri leggur útbúgvingin eisini dent á praktiskar førleikar og gott samband við arbeiðsmarknaðin. Partur av undirvísingini kann fara fram á enskum ella norðurlendskum máli. Kravið um at vera til staðar á lærustovninum og luttaka í undirvísing er størri enn undir vanligum universitetslestri.
Próvtøkur
Skipað verður fyri próvtøkum tvær ferðir um árið. Í heyst-semestrinum eru próvtøkur vanliga í desember og januar, og í vár-semestrinum eru próvtøkur vanliga í mai og juni. Tó kunnu próvtøkur eisini koma fyri onnur tíðarskeið.
Endurpróvtøka og sjúkrapróvtøkur verða skipaðar eftir reglugerðum Setursins.
Próvtøkurnar kunnu vera skrivligar uppgávur við ella uttan munnliga verju. Eisini kunnu próvtøkur vera munnligar. Masterritgerðin verður vard munnliga.
Upptøkutreytir
Fortreytin fyri upptøku er, at viðkomandi hevur staðið bachelorútbúgving í samfelagsvísindum ella stjórnmálafrøði. Um umsøkjarin hevur aðra bachelorútbúgving, skal umsøkjarin hava í minsta lagi 60 ECTS av samfelagsvísindaligum ella stjórnmálafrøðiligum skeiðum. Í hesum føri byggir avgerðin á eina heildarmeting av umsóknini.
Í heilt serligum føri kann víkjast frá hesum krøvum, um umsøkjarin á annan hátt hevur ognað sær vitan og lestrarførleika, ið kann javnsetast við viðkomandi bachelorútbúgving. Í hesum føri byggir avgerðin á eina heildarmeting av umsóknini. Saman við umsóknini skulu umsøkjarar senda eitt skriv, har grundgivið verður fyri umsóknini.”
Framtíðarmøguleikar
MSSc í samfelagsvísindum og stjórnmálafrøði er ein sterk samfelagsvísindalig útbúgving, sum byggir á vitan um og royndir við bæði altjóða og føroyskum viðurskiftum. Hon gevur hollar førleikar at starvast í tí privata, almenna og sjálvbodna geiranum.
Framhaldandi útbúgving
Við MSSc í samfelagsvísindum og stjórnmálafrøði ert tú eisini væl ílatin til víðari lestur á ph.d.-stigi.
Nærri kunning
Nærri kunning fæst við at venda tær til Kirstin Sigurðsdóttir Rasmussen, lestrarvegleiðara á Søgu- og samfelagsdeildini (kirstinr@setur.fo) ella við at venda sær til Hans Andrias Sølvará, útbúgvingarleiðara, hansas@setur.fo, tlf. 292583.
