Um útbúgvingina

Á masterútbúgvingini í samfelagsvísindum og stjórnmálafrøði lærir tú at greina samfelagsmenning og hvussu politiskar avgerðir verða tiknar – sjálvstøðugt og við kritiskum eyga, bæði í nærumhvørvinum og á altjóða stigi.

Harumframt fært tú førleikar, við ástøðiligum og metodiskum amboðum, at fata og tulka vísindaligar spurningar innan økið.

Upptøkutreytir

Treytirnar fyri upptøku eru, at tann lesandi hevur staðið bachelorútbúgving í samfelagsvísindum ella stjórnmálafrøði.

Um umsøkjarin hevur aðra bachelorútbúgving, skal hon/hann hava í minsta lagi 60 ECTS av samfelagsvísindaligum ella stjórnmálafrøðiligum skeiðum. Í hesum føri byggir avgerðin á eina heildarmeting av umsóknini.

Í heilt serligum føri kann víkjast frá hesum krøvum, um umsøkjarin á annan hátt hevur ognað sær vitan og lestrarførleika, ið kann javnsetast við viðkomandi bachelorútbúgving. Í hesum føri byggir avgerðin á eina heildarmeting av umsóknini. Saman við umsóknini skulu umsøkjarar senda eitt skriv, har grundgivið verður fyri umsóknini.

Ískoytiskrøv

Førleikar í samfelagsvísindaligum háttaløgum: At hava staðið í minsta lagi (vanliga 20 ECTS ella samsvarandi) skeið í samfelagsvísindaligum háttalagi. Hesi skeið skulu vera í minsta lagi á bachelorstigi. Upptøkunevndin metir í hvørjum einstøkum føri, um upptøkukrøvini eru uppfylt.

Málsligir førleikar: Fyri at kunna standa útbúgvingina er neyðugt, at tann lesandi hevur førleikar at lesa og tulka føroyskar, enskar og danskar tekstir. Somuleiðis er neyðugt, at tann lesandi hevur førleikar at skriva uppgávur, íroknað masterritgerðina, á einum av omanfyri nevndu málum.

Lestrarráðið tekur avgerðir um frávik frá hesum reglum.

Avmarkingar fyri upptøku av lesandi

Avmarkingar eru, í hvussu nógv lesandi verða tikin inn. Hesar avmarkingar verða ásettar á hvørjum ári og kunngjørdar sambært almennu reglunum á Setrinum.

Umsóknir um upptøku verða viðgjørdar við støði í, hvørji upptøkukrøv eru til masterútbúgvingina. Harumframt eru avgerðir hjá upptøkunevndini grundaðar á talið á lesandi, sum frammanundan eru á útbúgvingini eins og eina meting av, hvørt tann lesandi megnar at fylgja skeiðum, sum eru farin í gongd.

Setrið tilskilar sær rættin til ikki at taka lesandi inn, um so er at ov fáir skikkaðir umsøkjarar eru.

Setrið hevur serligar mannagongdir til masterlesandi, ið vilja flyta frá øðrum fróðskaparsetri til Setrið. Í slíkum føri kunnu lesandi seta seg í samband við lestrarvegleiðarar ella útbúgvingarleiðaran. Sí annars Kunngerð um upptøku til lestur á Fróðskaparsetri Føroya.

Søk umvegis Vangan

Søk her

Innihald

Fakliga innihaldið í útbúgvingini er nágreiniliga lýst í skeiðslýsingum og í pensumlistunum, sum eru tøk á heimasíðu setursins.

Skipan av útbúgvingini

Masterútbúgvingin telur 120 ECTS, sum svarar til eitt fulltíðarstarv í tvey lestrarár. Útbúgvingin er skipað í 4 lestrarhálvur, har hvør lestrarhálva telur 30 ECTS. Í hvørjari skeiðslýsing er ein lýsing av endamáli, innihaldi, arbeiðslagi í sambandi við læru- og undirvísing, umframt av læruúrtøkum og próvtøkuhættum sambært reglugerð fyri Fróðskaparsetur Føroya.

Framtíðarmøguleikar

Útbúgvingin gevur førleikar til leiðandi størv innan privata, almenna og sivilsamfelagsligu sektorarnar, bæði lokalt og altjóða. Tann spesialisering, sum liggur í tilgongdini, gevur serliga góðar starvsmøguleikar á teimum økjum, tann lesandi sjálvur leggur dent á.

Framhaldandi útbúgving

Útbúgvingin gevur førleikar til víðari lestur á ph.d. stigi (Third Cycle Programmes).

Lestrarlív

Tá tú byrjar at lesa á Fróðskaparsetri Føroya, verður tú partur av einum livandi og tætt knýttum lestrarumhvørvi mitt í hjartanum av Havnini. Her ert tú – saman við hinum lesandi – í miðdeplinum, bæði tá ið tað kemur til læring og sosialt lív.

Frá fyrsta degi verður tú væl móttikin til eina skipaða intro-viku og verður partur av einum lestrarbólki saman við øðrum nýggjum lesandi.

Gott lestrarumhvørvi

Á Setrinum verður nógv gjørt fyri at skapa eitt gott lestrarumhvørvi. Her eru lestrarhøli, køkar og lestrarstovur, har tú kanst arbeiða saman við øðrum, drekka ein kaffimunn og taka tær av løttum. 

Tú fært skjótt eina kenslu av, hvussu tað er at lesa á einum universiteti, og hvussu tað er at vera partur av einum spennandi og mennandi felagsskapi.

Felagsskapur og netverk

Tú kanst eisini luttaka í ymiskum felagsskapum og tiltøkum, sum verða skipað av og fyri lesandi. Her møtir tú fólki úr øðrum útbúgvingum og árgangum – eitt frálíkt høvi at knýta vinabond og skapa eitt sosialt netverk. Eisini hevur tú møguleika at luttaka í ráðum og nevndum, har tú kanst gera mun og fáa royndir, sum kunnu brúkast seinni í lívinum.

At lesa í Føroyum merkir eisini, at náttúran og mentanin eru altíð tætt við. Tað er stutt millum lestrarhøli og fjøll, hav og mentanarlív – og hetta ger Tórshavn til eitt serliga gott stað at vera lesandi.

Endamál

Endamálið við útbúgvingini er at geva lesandi útbúgving í stjórnmálafrøði og samfelagsvísindum og at geva teimum førleikar at nýta ástøði og háttaløg Harumframt er endamálið - við ástøðiligum og metodiskum amboðum - at fata, tulka og greina vísindaligar spurningar innan stjórnmálafrøði og samfelagsvísindi. Eisini er endamálið at menna førleikar at nýta vísindaliga vitan í verki, at duga at síggja glopp í nýggjari vitan og leggja fram nýggj og nýhugsandi vísindalig úrslit.

Bygnaður

*) Valfak I, II og III á masterstigi kunnu takast á einum útlendskum univeristeti. Tey valfríu fakini, sum Fróðskaparsetrið bjóðar út, eru í løtuni hesi:
- 6111 Umhvørvissøga
- 6136 Demokrati, valskipanir og veljaraaferð
- 6137 Logikkur og kritisk hugsan
- 6327 Vinnu- maritim søga í 19. og 20. øld
- 2433 Løgsøga (heystfak)

Um innihaldið av teimum einstøku skeiðunum, slá upp á: www.skeid.setur.fo

Nærri kunning

Nærri kunning fæst við at venda sær til Kirstin Sigurðsdóttir Rasmussen, lestrarvegleiðara á Søgu- og samfelagsdeildini (kirstinr@setur.fo) ella við at venda sær til Hans Andrias Sølvará, útbúgvingarleiðara (hansas@setur.fo).