Almenn ráðstevna: Føroyar í Europa
Nú Føroyar skulu hava fullan limaskap í EHEA, og hægri útbúgvingar her tí skulu skipast eftir altjóða leisti, verður boðið til ráðstevnu á Setrinum undir heitinum "Føroyar í Europa"
Barna- og útbúgvingarmálaráðið og Fróðskaparsetur Føroya skipa fyri almennari ráðstevnu í Kongshøll fríggjadagin 10. november frá klokkan 13:00 til 16:00 um komandi limaskapin hjá Føroyum í europeiska økinum fyri hægri útbúgving (EHEA).
Endamálið við ráðstevnuni er at seta ítøkilig orð á tað góðskuarbeiðið, sum skal rótfestast, so álitið á føroyskar útbúgvingar innan- og uttanlands altíð hevur gott og gjøgnumskygt grundarlag.
Vit viðgera, hvussu góðskusamstarvið í Europa er við til at tryggja okkum altjóða góðskustig á hægri útbúgvingum, samstundis sum atlit verða tikin at okkara lokalu frábrigdum.
Á skránni verða føroyskar og útlendskar framløgur, har vit m.a. fara at hoyra um, hvussu aðrar smátjóðir í Europa hava gjørt, og hvat gagn tær hava fingið av sínum limaskapi í europeiska samstarvinum fyri hægri útbúgvingar. Eisini fara vit at hoyra um leiklutin hjá teimum føroysku lesandi, um politisku raðfestingarnar, og hvussu langt útbúgvingarmyndugleikin og Fróðskaparsetur Føroya eru komin í tilgongdini fram móti fullum limaskapi í EHEA.
Ráðstevnan er fyri øll, sum arbeiða við og hava áhuga fyri at fáa viðurskiftini á útbúgvingarøkinum í Føroyum skipað, so tey eru fult í tráð við altjóða krøv.
Øll eru hjartaliga vælkomin!
SKRÁ
13.00: Vælkomin
13:05: Djóni Nolsøe Joensen, landsstýrismaður setir ráðstevnuna
13:10: Martin Tvede Zachariasen, rektari: Fróðskaparsetur Føroya sum altjóða universitet
13:35: Jordi Lombart, Bologna Follow-up Group, útbúgvingarmálaráðið í Andorra: Limatreytir og ágóði hjá smátjóðum í EHEA/Bologna-samstarvinum
14:05: Terji Beder, fulltrúi í Barna- og útbúgvingarmálaráðnum: Hvat restar í hjá Føroyum fyri at fáa fullan limaskap í EHEA?
14:35: Kaffisteðgur
14:55: Magnus Kárason Durhuus, forseti í Meginfelag Føroyskra Studenta: Lesandi sum undangongufólk og rødd teirra í Europa
15:15: Ólöf G. Sigfúsdóttir, leiðari í Góðskuráðnum fyri hægri útbúgvingar í Íslandi: Soleiðis góðskutryggja íslendingar sínar hægri útbúgvingar samsvarandi Bologna/EHEA.
15:45: Samanumtøka.
16:00: Prát og okkurt til góman.
