![](https://setur.cdn.fo/savn/7327/bjørn-kunoy-ssd.jpg?width=624&height=350&rmode=crop&s=R8ookkcVRJpJlWAZq6k-vqtAB0Y)
Nýggj grein í Cambridge University Press
Nýggj vísindalig grein viðger gerðarættir og dómsskipanir, sum loysa altjóðarættarligar trætur, tá tað ræður um havrættarsáttmálan hjá ST
Í seinastu útgávu av Leiden Journal of International Law, sum er eitt viðurkent tíðarrit um altjóðarætt, og sum Cambridge University Press gevur út, er grein eftir Bjørn Kunoy, professara í altjóða lóg á Fróðskaparsetri Føroya.
Greinin eitur “Dislodging the compulsory dispute settlement mechanism: Analysis of Article 281 of UNCLOS”, og í henni viðger Bjørn Kunoy gerðarrættir og dómsskipanir, sum virka fyri at loysa altjóðarættarligar trætur við støði í havrættarsáttmálanum hjá Sameindu Tjóðum.
Havrættarsáttmálin hjá ST leggur lunnar undir eina tvingaða gerðarrættar- og dómskipan, har at kalla allar trætur kunnu latast til gerðarrættir, altjóða havrættardómstólin í Hamburg ella til altjóða dómstólin í Haag. Tó ber til hjá sáttmálapørtum við støði í grein 281 í havrættarsáttmálanum hjá ST at gera semju um at gera hesa - annars tvingaðu - skipan óvirkna.
Bjørn Kunoy útgreinar, hvussu grein 281 hevur virkað, síðani havrættarsáttmálin varð settur í gildi.
Hugt verður at øllum dóms- og gerðarrættarúrskurðum fyri m.a. at vísa á ósamanhangandi niðurstøðurnar í úrskurðunum.
Við støði í altjóða siðvenju í tulkingarrætti verður eisini hugt kritiskt at grundgevingunum í hesum dóms- og gerðarrættarúrskurðum, og sum í summum førum eru lítið sambærligar við altjóða siðvenju í tulkingarrætti.
Fyri at stuðla upp undir niðurstøðurnar verður eisini hugt at forarbeiðunum til havrættarsáttmálan, áðrenn skrivað verður, hvørji fyrilit eiga at liggja til grundar fyri tulkingini av ásetingini í havrættarsáttmálanum, ið loyvir sáttmálapørtum at seta úr gildi tvingaðu gerðarrættar- og dómsskipanina, tá tað ræður um trætur, sum viðvíkja viðurskiftum, sum verða skipað av havrættarsáttmálanum.
Samandráttur av greinini er her.
- 28.06.2024211 setursprógv, myndir og røðurNú árið er gjørt upp eftir prógvhandarnirnar, hava 211 fi...
- 28.06.2024 Setrið Lestrarskrivstovan- Kom og les á okkara universitetiNú nærkast umsóknarfreistin at søkja um lestrarpláss á Fr...
- 28.06.2024 Setrið NáttúruvísindadeildinLesandi funnið nýggja klukku í SandoynniÍ hesi vikuni hava lívfrøðilesandi á Náttúruvísindadeildi...