![](https://setur.cdn.fo/savn/8699/altjóða-summarskeið-2022.jpg?width=624&height=350&rmode=crop&s=UkHBgiuw0S4t0_9ttWDi3EGsb-g)
Stórur áhugi fyri altjóða summarskeiði í Føroyskum
Stórur og vaksandi áhugi er hjá útlendskum studentum at koma á altjóða summarskeið á Setrinum í Føroyskum
Hvørt summar bjoðar Føroyamálsdeildin eitt altjóða skeið í føroyskum máli, bókmentum og søgu, og áhugin fyri tí er bæði stórur og vaksandi millum útlendsk lesandi.
Nú evstamark at søkja fór, eru 46 umsóknir komnar úr Norðurlondum, Týsklandi, Onglandi, USA, Grikkalandi, Portugal, Japan og Sveis. Talið er ov stórt til, at øll fáa pláss, men tey, sum lúka treytirnar fyri upptøku koma á bíðilista.
Ein treyt fyri at fáa pláss á summarskeiðinum er, at umsøkjararnir eru innskrivaðir til lestur, ella fyrr hava lisið á hægri lærustovni. Neyðugt er eisini, at tey hava grundleggjandi vitan um germansk mál.
Skeiðið í ár verður frá 1. - 21. august, og tað eru Sissal Maria Rasmussen og Lena Reinert, sum fyrireika og samskipa skeiðið.
Bergur Durhuus Hansen, sum er dekanur á Føroyamálsdeildini, heldur, at hetta altjóða summarskeiðið er virðismikið og vælumtókt.
- Fleiri av teimum, sum hava verið á summarskeiði undanfarnu árini, eru í dag týðarar úr føroyskum í onnur mál ella eru vend aftur á Fróðskaparsetrið sum gestagranskarar, hava skriva ritgerðir um føroyskt ella hava á annan hátt hildið fram og arbeitt við føroyskum, sigur hann.
- Summarskeiðið prógvar eisini møguleikarnar, sum eru í at menna altjóða skeið á Fróðskaparsetrinum sum heild, sigur Bergur Djurhuus Hansen.
- 28.06.2024211 setursprógv, myndir og røðurNú árið er gjørt upp eftir prógvhandarnirnar, hava 211 fi...
- 28.06.2024 Setrið Lestrarskrivstovan- Kom og les á okkara universitetiNú nærkast umsóknarfreistin at søkja um lestrarpláss á Fr...
- 28.06.2024 Setrið NáttúruvísindadeildinLesandi funnið nýggja klukku í SandoynniÍ hesi vikuni hava lívfrøðilesandi á Náttúruvísindadeildi...